MAZU MA KUSAMBISH : RUTONG RA BLOG

MAZU MA KUSAMBISH

Chiletining musangar nakash anch wajingunin yom yishimwokishena mu dizu diey dia chivadik. Pakwez, chiletining kand ushon anch uswirikedin kwijik yom yivud mu dizu diey, chad kwamwamu mikand yiwanyindina kutang. Mulong wa kwikal ni mikand yiney, chifanyidin in kufund ipana nakash mu kufund jinsangu ni yom ya usey mulong wa dizu kuya kurutu.  Kudi antu avud asadina kal usu winou mulong wa kufund yom yivud yitadina mudi piur pa ukash wa mujimbu, kwinang, misong, mayej, jingany, atupwapu, annam, yitang yawonsu, yom ya yishankur, ni yikwau yikwau. Kujikitish kujim nakash kudi antu inay, asadina yawonsu yitwishinau mulong wa kupan ronganyin rau kudi ansand ni amakurump a pa chirung chetu. Tufanyindin kusadin yom yiney.

  Ku mutambu wamam, nasadin usu wa kukimbijol yom kushalijan piur pa dizu dia Uruund ni nikat kudandamen niyam kwilej. Mu blog winou mud yom yivud yimutadina muntu ni muntu, ikala ikundj ap mband, mukurump ap mwan mukemp, nsand ap changadim, awonsu akutwish kutan ukwash uswirikedinau piur pa yom ya dizu dietu. Mud kand yom yitadina midimu kushalijan ya an a antu yisadinau nleu unou ap yasalangau pasak. Yom ya mu chikumbu, yakudia ni yidjal, kwipuwangej, ni jinsangu jikwau piur pa yom yitunyingumukina. Yawonsu yiney mu dizu dia Uruund. 

  Nikwet kashinsh ansh mudimu winou ukushal mu makas ma antu awonsu asotina kwijik yivud. Nikusanger kand yiyul yen ya rukat mulong wa kutenchik kuwamp ni kuwanyidina kwa dizu dined dilondinau kudi antu avud.

Mutombu Richard